ភ្នំពេញៈ ស្ត្រីអ្នកភូមិបឹងកក់ម្នាក់ ក្នុងចំណោមគ្នា៧នាក់ ដែលកំពុងជាប់ឃុំនៅពន្ធនាគារព្រៃស (ម២) ត្រូវបានមន្ត្រីអនុរក្សពន្ធនាគារ ដឹកយកទៅសង្គ្រោះនៅមន្ទីរពេទ្យមិត្តភាពខ្មែរ-សូវៀត កាលពីរសៀលថ្ងៃចន្ទម្សិលមិញ បន្ទាប់ពីអាការជំងឺខ្សោយបេះដូងរបស់គាត់ បានធ្វើទុកខ្លាំង ធ្វើឲ្យគាត់ថប់ដង្ហើម។ នេះបើតាមការប្រាប់ឲ្យដឹងពីលោកអំ សំអាត មន្ត្រីជាន់ខ្ពស់ នៃអង្គការសិទ្ធិមនុស្សលីកាដូ។
លោក សំអាត បានថ្លែងថា អ្នកស្រី ផាន់ ឈុនរ៉េត អាយុ ៥៤ ឆ្នាំ ត្រូវបានក្រុមមន្ត្រីអនុរក្សពន្ធនាគារដឹកបញ្ជូនមកកាន់មន្ទីរពេទ្យមិត្តភាពខ្មែរ-សូវៀតកាលពីល្ងាចម្សិលមិញ ដើម្បីពិនិត្យអំពីស្ថានភាពជំងឺបេះដូងរបស់គាត់។ គ្រូពេទ្យបានពិនិត្យឃើញថា ចង្វាក់បេះដូងរបស់គាត់លោតបានត្រឹមតែ ៣៦ដង ក្នុងមួយនាទីប៉ុណ្ណោះ ដែលធ្វើឲ្យគាត់មានអាការពិបាកក្នុងការដកដង្ហើម។
លោកបានថ្លែងបន្តថា តាមធម្មតា មនុស្យដែលមានវ័យចំណាស់ដូចគាត់ ចលនាបេះដូងអាចលោតបានចន្លោះពី ៦០ ទៅ១០០ដងក្នុងមួយនាទី ទៅតាមស្ថានភាពសុខភាពនៃបុគ្គលម្នាក់ៗ ប៉ុន្តែសម្រាប់គាត់ គឺខ្សោយខ្លាំងណាស់។ គាត់ត្រូវបានក្រុមវេជ្ជបណ្ឌិតនៃមន្ទីរពេទ្យមិត្តភាពខ្មែរ-សូវៀត បញ្ជូនទៅក្នុងបន្ទប់ថតកាំរស្មីអ៊ិច (X-ray) ដើម្បីឆ្លុះមើលថាតើបេះដូងគាត់ «រីក ឬ រួម»។
យ៉ាងហោចណាស់ មន្ត្រីអនុរក្សពន្ធនាគារបីនាក់ បានឈរយាមនៅមុខបន្ទប់ព្យាបាល និងមិនអនុញ្ញាត ឲ្យនរណាម្នាក់ ទោះជាក្រុមគ្រួសារចូលសួរសុខទុក្ខឡើយ។
ក្រោយពីថតកាំរស្មីអ៊ិចរួច ស្ត្រីរូបនេះត្រូវបានក្រុមមន្ត្រីអនុរក្សពន្ធនាគារ បញ្ជូនទៅកាន់ពន្ធនាគារព្រៃសវិញយ៉ាងប្រញាប់ប្រញាល់បំផុត បន្ទាប់ពីក្រុមវេជ្ជបណ្ឌិតបានបញ្ជាក់ថា កម្មវិធីពិនិត្យព្យាបាលជំងឺបេះដូង មានតែនៅពេលព្រឹកប៉ុណ្ណោះ។
លោកអំ សំអាត បាននិយាយទៀតថា៖«ទោះជាបែបណា គាត់គួរត្រូវបានគេអនុញ្ញាតឲ្យស្នាក់នៅក្នុងមន្ទីរពេទ្យ ដើម្បីបន្តធ្វើការតាមដានអំពីអាការជំងឺ និងធ្វើការព្យាបាលនៅព្រឹកថ្ងៃ[អង្គារ]នេះ។ យើងពិតជាបារម្ភពីស្ថានភាពជំងឺ របស់គាត់ និងក្រុមស្ត្រីដែលកំពុងធ្វើកូដកម្មអត់អាហារផ្សេងទៀត នៅក្នុងពន្ធនាគារព្រៃស»។
កាលពីថ្ងៃទី១០ ខែវិច្ឆិកា ឆ្នាំ២០១៤ អ្នកស្រី ផាន់ ឈុនរ៉េត និងសកម្មជនស្ត្រីដីធ្លី នៃសហគមន៍បឹងកក់៦នាក់ផ្សេងទៀត ត្រូវបានអាជ្ញាធររាជធានីភ្នំពេញចាប់ខ្លួន ដោយសារពួកគាត់បាននាំគ្នាតវ៉ាបិទផ្លូវនៅមុខសាលារាជធានី ទាមទារឲ្យមានការរៀបចំប្រព័ន្ធលូបង្ហូរទឹកស្របតាមស្ដង់ដាបច្ចេកទេស ដើម្បីរំដោះទឹកជំនន់ទឹកភ្លៀង ដែលបានជន់លិចលំនៅឋានរបស់ពួកគាត់៕
ប្រភព៖ ភ្នំពេញប៉ុស្តិ៍
Post a Comment