អ្នកលក់ភេសជ្ជៈ និងវត្ថុអនុស្សាវរីយ៍នៅមុខប្រាសាទបាខែង ខេត្តសៀមរាប រាប់សិបនាក់ចោទប្រកាន់អាជ្ញាធរជាតិអប្សរាថាយកលេសកាត់បន្ថយផលប៉ះពាល់ទេសភាពវប្បធម៌បុរាណ បរិស្ថាន និងបុរាណវិទ្យា នៅតំបន់រមណីយដ្ឋានប្រវត្ដិសាស្ដ្រអង្គរ ដើម្បីបណ្ដេញពួកគាត់ចេញពីកន្លែង ដែលពួកគាត់ធ្លាប់រកស៊ីចិញ្ចឹមជីវិតជាយូរមកហើយ។
អាជីវករចូលរួមតវ៉ាប្រឆាំងនឹងកម្លាំងអាជ្ញាធរជាតិអប្សរា ដែលមានគម្រោងចុះរុះរើតូបលក់ដូររបស់ពួកគេនៅព្រឹកថ្ងៃចន្ទនេះឲ្យដឹងថា ការដែលអាជ្ញាធរជាតិអប្សរាបង្ខំឲ្យពួកគេរុះរើតូបលក់ដូរទៅកន្លែងផ្សេងនោះ គឺដើម្បីបង្កើតស្ដង់លក់កាហ្វេ និងរោងដាក់កាបូបឲ្យទេសចរទស្សនាប្រាសាទភ្នំបាខែង មិនមែនដើម្បីការពារបរិស្ថាន និងទេសភាពវប្បធម៌បុរាណស្អីនោះទេ ។
អាជីវករលក់នៅខាងមុខប្រាសាទភ្នំបាខែង អ្នកស្រី ម៉ាត់ លី ដែលមានមុខរបរលក់ដូរនៅតាមប្រាសាទបុរាណតាំងពីឆ្នាំ១៩៩៣មក ប្រាប់VOD នៅកន្លែងប្រមូលផ្ដុំថា ការលក់ដូរនៅខាងមុខប្រាសាទភ្នំបាខែងនោះ មិនមានផលប៉ះពាល់ដល់បុរាណវិទ្យា និងសណ្ដាប់ឡើយ ប៉ុន្ដែអាជ្ញាធរមានគម្រោងយកកន្លែងនោះ ដើម្បីជាប្រយោជន៍បុគ្គល។
អគ្គនាយកអាជ្ញាធរជាតិអប្សរា លោក ប៊ុន ណារិទ្ធិ បដិសេធការចោទប្រកាន់របស់អាជីវករទាំងនោះថា អាជ្ញាធរគ្មានគម្រោងធ្វើដូចការចោទប្រកាន់របស់អាជីវករនោះទេ ផ្ទុយទៅវិញគឺអាជ្ញាធរចង់ឲ្យពួកគាត់លក់ដូរមានរបៀប និងសណ្ដាប់ធ្នាប់ល្អ។
សូមបញ្ជាក់ថា អាជ្ញាធរជាតិអប្សរាកាលពីថ្ងៃទី១៤ ខែវិច្ឆិកា ឆ្នាំ២០១៤ កន្លងទៅនេះបានចេញសេចក្ដីជូនដំណឹង ឲ្យក្រុមអាជីវករនៅខាងមុខប្រាសាទភ្នំបាខែង និងខ្លោងទ្វារប្រាសាទអង្គរធំ (ទន្លេអុំ) រុះរើតូបពួកគេចេញឲ្យអស់ជាស្ថាពរ នៅថ្ងៃទី១៥ ខែធ្នូនេះ ក្រោមហេតុផលកាត់បន្ថយផលប៉ះពាល់ទេសភាពវប្បធម៌បុរាណ បរិស្ថាន និងបុរាណវិទ្យា នៅតំបន់រមណីយដ្ឋានប្រវត្ដិសាស្ដ្រអង្គរ៕
Post a Comment